Հելսինկյան Քաղաքացիական Ասամբլեայի Վանաձորի գրասենյակի դիտորդ Հայկուհի Հարությունյանը երեկ անց է կացրել Լեռնապատի ընտրական տեղամասում: Նա պատմում է, թե գյուղապետը ամեն կերպ փորձել է ուղղորդել ընտրողներին:

«Կանգնում էր քվեախցիկից քիչ հեռու ու սպասում, որ քվեաթերթիկները ցույց տան իրեն»,-ասում է դիտորդը: Գյուղացիները մտնելով տեղամաս՝ առաջի հերթին ողջագուրվում էին գյուղապետի հետ, հետո քվեարկում բաց: Երբ Հայկուհի Հարությունյանը միջամտել է, բողոքել է բաց քվեարկության դեպքերից ու գյուղապետի կողմից համագյուղացիներին գնդիկավոր գրիչներ բաժանելու փաստից, հանձնաժողովի նախագահ Արայիկ Քոչարյանը թույլ չի տվել գրանցման մատյանում արձանագրություն կազմել: «Ուղղակի արգելեցին»,-ասում է նա:
Իսկ գյուղապետը սպառնացել է՝ «սենց չեմ թողնի»:

Դիտորդն ահազանգել է ընտրատարածքային ընտրական հանձնաժողով, որի անդամները գալով տեղամաս՝ գյուղապետին հորդորել են հարգալից վերաբերվել:

«Ընտրատարածքայինի անդամները իրենց աչքով տեսան գյուղապետի պահվածքն ու քվեարկության գործընթացը, ՕԵԿ ներկայացուցիչ Բարսեղ Մակասյանն էլ ասաց. «Այստեղ քվեարկություն չկա, բարդակ է»»,-ասում է Հայկուհին։

Ընտրատարածքային հանձնաժողովի անդամների գնալուց հետո դիտորդ-գյուղապետ վեճը շարունակվել է: Հայկուհի Հարությունյանը հատուկ կարծիք է կազմել Լեռնապատ գյուղում բաց քվեարկության, գյուղապետի պահվածքի վերաբերյալ: Նա երկու արձանագրություն է գրել նաեւ քվեարկության կարգի խախտումների մասին, որոնցից մեկը վերաբերում էր մոր անձնագրով աղջկա, մյուսը՝ կույր հոր փոխարեն որդու քվեարկության մասին: Նա հիշում է, թե ինչպես Հանրապետական կուսակցության անդամ, Արամ Հարությունյանի վստահված անձ գյուղապետը Դաշնակցության վստահված անձի հետ անընդհատ ստուգում էր քվեարկությանը մասնակցած գյուղացիների ցուցակն ու զանգում-կանչում դեռ չեկածներին:

Այն, որ Վանո Եղիազարյանը միջամտել է քվեարկության գործընթացին, արձանգանքել են միայն ՕԵԿ անդամը եւ Լեւոն Տեր Պետրոսյանի վստահված անձը:
Լեռնապատում Արամ Հարությունյանը հավաքել է մեկ ձայն:

Նաիրա Բուլղադարյան
Վանաձոր