Տեր-Պետրոսյանն ասաց, որ բավարարված է դեպքերի ընթացքից: «Երբ պայքարի են ելնում երկու բևեռ, յուրաքանչյուրն իր սցենարն ու ծրագիրն ունի: Հինգ ամսվա մեր պլանները մենք իրագրծել ենք անբիծ ու ուղղագիծ` առանց շեղվելու»: Տեր-Պետրոսյանի խոսքով` իշխանությունները տարբեր պրովոկացիաների մեջ ներքաշելու փորձեր ձեռնարկել են, սակայն դրանք չեն հաջողել: «Մեր շարժումը թափ է առնում, մեր շարքերը խտանում են», - ասաց նա:

Տարածվող լուրերն այն մասին, որ իշխանությունները պատրաստվում են բռնություններ կիրառել ժողովրդի դեմ,  նպատակ են հետապնդում` «վախ մտցնել ժողովրդի մեջ, այդ կերպ մաշեցնել շարժումը և ոգևորել սեփական թիմին»: Իսկ թիմին ոգևորելու կարիք կա, քանի որ, ըստ Լևոոն Տեր-Պետրոսյանի, «պետական մեքենան ջարդվում է»:

Տեր-Պետրոսյանն իր խոսքն ուղղեց նաև միջազգային դիտորդներին: «Այսօր էլ նրանց աչքի առջև շարունակվում են նույն բռնությունները, որոնք տեղի են ունենում փետրվարի 19-ից սկսած»: Տեր-Պետրոսյանը խոսեց վերահաշվարկի իրենց դիմումների անտեսման փաստի մասին, ասաց, որ ներկայացված երեք հարյուր դիմումներից բավարարվել է միայն մեկը ու վերահաշվարկ կատարվել է միայն մեկ տեղամասում:

«Լինելով նորմալ, ռացիոնալ մարդ` ես մի բան կարող եմ եզրակացնել. արևմուտքը թքած ունի մեր դեմոկրատիայի վրա: Արևմուտքը անկեղծ չէ, որ ուզում է ժողովրդավարություն հաստատել Հայաստանում: Նրան պետք է թույլ, բռնապետական իշխանություն, որպեսզի մշտապես լծակներ ունենա ազդելու»,-եզրակացրեց Լևոն-Տեր Պետրոսյանը:

Տեր- Պետրոսյանը առանձնացրեց նաև ԼՂՀ նախագահ Բակո Սահակյանի պահվածքը: Հիշեցրեց, որ և 2003-ին, և 2004-ին Ղարաբաղից Հայաստան են բերվել հատուկ զորքեր, ու Ղարաբաղը չի կարողացել խուսափել Հայաստանի ներքին կյանքին միջամտելուց: «Ի պատիվ Բակո Սահակյանի պետք է ասել, որ նա ցուցաբերում է պետական այրին վայել դիրքորոշում»,-ասաց առաջին նախագահը: