Հանրահավաքի մասնակիցների թիվն այս անգամ, նախորդների համեմատ, ավելի սակավաթիվ էր: Մատենադարանի հրապարակում մինչեւ հինգ հազար մարդ էր հավաքվել:

Հանրահավաքն արտոնված էր, երթը` ոչ: Այս մասին ընդդիմության առաջնորդ Լեւոն Տեր-Պետրոսյանին եւս մեկ անգամ հիշեցրին ոստիկանները` Մատենադարանի հարթակ բարձրանալով: Հավաքվածները, սակայն, սպասում էին երթի:

Համաժողովրդական շարժման ներկայացուցիչ Դավիթ Շահնազարյանը խոսեց ընդդիմության անելիքների մասին, միեւնույն ժամանակ նշելով, որ ինքն էլ շատերի պես համարում է, որ պետք է անցնել կտրուկ գործողությունների: «Ինչքան էլ, որ մեր ցասումը արդարացի է, ազնիվ է, մենք պարտավոր ենք առաջնորդվել քաղաքական սառը հաշվարկով»,- ասաց Շահնազարյանը:

«Մենք հստակ պետք է հասկանանք, որ Շարժման համար հիմա կտրուկ գործողությունների անցման ժամանակը չէ»,- ասաց Դավիթ Շահնազարյանը, ավելացնելով, որ չպետք է թույլ տալ, որ Հաժողովրդական Շարժումը օգտագործվի դրսի ուժերի կողմից:

Հաժողովրդական Շարժման համակարգող Լեւոն Զուրաբյանն էլ խոսեց ընդդիմության անելիքների մասին: «Բռնապետության դեմ պայքարը ունի իր տրամաբանությունը եւ կանոնները: Նրանք ուզում են մեզ ներքաշել առճակատման, մենք նրանց այդ հաճույքը չենք պատճառի: Մենք կպայքարենք իրենց համար խոցելի ոլորտում` գաղափարների ոլորտում»,- ասաց Զուրաբյանը:

Ընդդիմության առաջնորդ Լեւոն Տեր-Պետրոսյանը խոսեց մոտ կես ժամ: Նա վերլուծեց աշխարհաքաղաքական իրավիճակը` նշելով, որ Հայաստանի համար արտաքին քաղաքականության ոլորտում դժվար ժամանակներ են: Նա էլ խոսեց ընդդիմության քայլերի մասին: «Ես գիտեմ, որ հասարակության մեջ կան ավելի վճռական գործողությունների անցնելու տրամադրություններ, բայց ես ձեզ խնդրում եմ, կոչ եմ անում հավատալ Շարժման առաջնորդներին»,- ասաց Տեր-Պետրոսյանը: Նա նշեց, որ իրենց գլխավոր սկզբունքն է եւ Շարժման հզորությունը ապահովելը, եւ Պետությանն ու ժողովրդին չվնասելը:

«Ես ձեզ մաղթում եմ հաղթածի արժանապատվություն, վեհանձնություն եւ հարատեւություն: Մի կասկածեք ձեր ուժերի, մեր ուժերի վրա: Մենք միասին ենք եւ միասին էլ հասնելու ենք մեր հաղթանակին»,- ելույթը եզրափակեց Տեր-Պետրոսյանը:

Հանրահավաքի վերջում Լեւոն Զուրաբյանը հայտարարեց, որ այսօր երթ չի լինի: Նա տեղեկացրեց, որ հաջորդ հանրահավաքն ընդդիմությունը կանցկացնի սեպտեմբերի 26-ին` Կենտրոնի թաղապետի ընտրություններից 2 օր առաջ: Այդ համայնքում ընդդիմությունը պաշտպանում է ՀՀՇ նախագահ Արարատ Զուրաբյանի թեկնածությունը: