2009-05-07 04:36

Նվեր Մնացականյանի վրա հարձակվել են մայիսի 6-ի լույս 7-ի գիշերը ժամը 00։02-ին, Մարգարյան փողոցի թիվ 20/3 շենքի 1-ին մուտքի դիմաց։ Երկու անհայտ անձինք ծեծի են ենթարկել Մնացականյանին եւ փախուստի դիմել:

Նվեր Մնացականյանը «Ա1+»-ին պատմել է դեպքի մանրամասները: «Մեքենան ավտոտնակում կանգնեցնելուց հետո գալիս էի տուն, շենքի անկյունից նկատեցի նրանց, մուտքի մոտ երկուսով դեմ դիմաց կանգնած էին, շշնջում էին, ինչ-որ բան էին խոսում: Ինչ-որ բան կանխազգացի, հեռախոսը հանեցի, որ զանգեմ տղայիս, ինքը սովորաբար այդ ժամին տանն է լինում: Կանգնեցի: Հեռախոսն էի ուզում միացնեի` զանգը գնա, առանց որեւէ բառ ասելու, շրջվեցին եւ խփեցին, գցեցին գետնին: Բղավում էի, տղայիս էի կանչում, այդ ժամանակ հարեւանները շատ արագ արձագանքեցին, ինչը մեծ դեր խաղաց, որ շուտ փախչեն»,- պատմել է Նվեր Մնացականյանը: Ըստ նրա նկարագրության` հարձակվողները եղել են ատլետիկ կազմվածքով, գլխարկներով:

Նվեր Մնացականյանն «Ա1+»-ին ասել է, որ հարձակման փաստը կապում է իր մասնագիտական գործունեության հետ, որովհետեւ այլ գործունեություն չունի: Հարցին, թե չի կապում արդյոք վերջին օրերին ծավալվող Գագիկ Ծառուկյան-Ահարոն Ադիբեկյան բանավեճի հետ, նա ասել է. «Որեւէ բանի հետ չեմ կապում: Այնքան այդպիսի բաներ են լինում: Այդպիսի ամեն մի պատմությունը, որ սրանով ավարտվի, պատկերացնո՞ւմ եք»:

«Բարգավաճ Հայաստան» կուսակցության (ԲՀԿ) առաջնորդ Գագիկ Ծառուկյանի մամուլի քարտուղար Խաչիկ Գալստյանը պաշտոնապես հերքել է այն լուրերը, թե իբր «Շանթ» հեռուստաընկերության մեկնաբան Նվեր Մնացականյանը ծեծի է ենթարկվել Գագիկ Ծառուկյանի պատվերով։

«Դա չափազանց պրիմիտիվ քայլ կլներ մեր կողմից: Ես անգամ տեղյակ չեմ, թե արդյոք Մնացականյանի ծեծը համապատասխանում է իրականությանը: Կարծում եմ, այսօր երեկոյան, ինչպես միշտ, մենք նրան կտեսնենք «Շանթի» եթերում», - ասել է Գալստյանը «Արմինֆո»-ին, ավելացնելով, թե որպես լրագրող Նվեր Մնացականյանը խնդիրներ ունի Ահարոն Ադիբեկյանի անցկացրած սոցիոլոգիական հարցումների արդյունքներն օբյեկտիվ ներկայացնելու առնչությամբ, սակայն դա արդեն նրա գործն է:

Նվեր Մնացականյանի վրա հարձակումը չի մեկնաբանում «Շանթ»-ի ղեկավարությունը։ «Կատարվում է հետաքննություն, հաշվի առնելով հենց այդ հանգամանքը, «Շանթ» հեռուստաընկերությունը առայժմ ձեռնպահ է մնում մեկնաբանություններից»,- հաղորդվում է «Շանթ»-ի «Հորիզոն» լրատվական հաղորդման ժամանակ լրագրողի վրա հարձակման մասին պատմող սյուժեից հետո։