2009-06-22 04:52

Ինչպես տեղեկացնում է ՀՀ Վճռաբեկ դատարանի մամուլի քարտուղար Ալինա Ենգոյանը, «կիրառելով ՀՀ Ազգային ժողովի կողմից 2009 թվականի հունիսի 19-ին ընդունված համաներում հայտարարելու մասին որոշման առաջին կետի առաջին ենթակետը՝ դատարանը Օնիկ Ալեքսանյանին ազատել է նշանակված պատժից։ Միաժամանակ դատարանը որոշում է կայացրել որպես խափանման միջոց ընտրված կալանքը վերացնելու և Օ.Ալեքսանյանին անհապաղ դատական նիստերի դահլիճից ազատ արձակելու մասին։

Համաձայն մեղադրական եզրակացության՝ Օնիկ Ալեքսանյանը մեղադրվում էր այն բանում, որ հանդիսանալով Երևանի ավագանու ընտրությունների ընթացքում ձևավորված թիվ 8/15 ընտրական տեղամասի հանձնաժողովի նախագահ, կեղծել էր հիշյալ տեղամասի ընտրությունների արդյունքները։

Համաներումը կտարածվի նաեւ Մալաթիա-Սեբաստիա համայնքի ընդհանուր իրավասության դատարանի կողմից 3 տարվա ազատազրկման  դատապարտված Նորիկ Միշայի Եղիազարյանի և Արմեն Հայկազի Օհանյանի վրա։

Նորիկ Եղիազարյանը և Արմեն Օհանյանը դատապարտվել էին մայիսի 31-ի ընտրությունների ժամանակ 8/5 տեղամասում քվեաթերթիկները պատճենահանելու եւ 16 քաղաքացիների փոխարեն Հայաստանի Հանրապետական կուսակցության օգտին ապօրինաբար քվեարկելու համար։